Dr Ranginui Walker. He haka tēnei i whakairotia e Dr Te Kahautu Maxwell o Te Whakatōhea hai whakamānawatanga atu mō Dr Ranginui Walker. I hakaina tēnei haka e Ōpōtiki Mai Tawhiti ki Te Matatini i te tau 2017, 2023 anō hoki.
Te reo Māori
Takapūtahi! Tēnā huakina! Huakina mai te tatau o Tūmonoariki
Te Whare Pūkenga i a Ranginui e tū iho nei! Hō!
Ranginui-ā-Tāmaki-makarau! Hō! Ranginui-ā-Tāne! Hō!
Ranginui-Te-Pūkenga! Hō! Ranginui-Te-Wānanga! Hō!
Ranginui-Te-Mahara! Hō! Ranginui-Tohetohe! Au! Au! Au!
Ngāti Whātua Manawatoa! Ngāti Whātua Horonuku!
Te Whakatōhea Pākaurangi! Tohetohe! Au! Au! Au!
Te Kōtiritiri! Te Kōtaratara! Te kai hoki i Waiaua e!
Haere tītaha ana te kaha o te kupenga ki uta rā e.
Hurihia te tangata mātātoa. Hurihia te tangata matāwhanga.
Hauhauhia te ture! Hauhauhia te ture! Matā kai kutu ki roto ki te Pāremata
Ranginui hī! Ranginui hō! Ka whawhai tonu mātou ake ake ake.
Te Matangitangi! Te Mataraharaha!
Haere matataua Ngā Tamatoa [o] te kotahitanga kai te rangi e haere ana auē taukurī!
Hurihia matakīrea matakohuki! Hurihia matakīrea matakōkiri!
Hauhaua te Tiriti! Hauhaua te Tiriti! Te Tiriti o Waitangi ki roto ki Te Taraipiunara.
Ranginui hī! Ranginui hō! Ka whaiwhai tonu mātou ake ake.
Te Horopekapeka! Te Horopetapeta!
He tangata rākau kawa ki te whakakaitoa kuku-ā-mata, te kuku o te manawa.
Waerea te maruwehi! Waerea te marutuna!
Hurihia te tangata matawaenga! Hurihia te tangata mātātaki!
Ko te mana tuatahi ko Te Tiriti o Waitangi. Ko te mana tuarua ko Te Kōti Whenua. Ko te mana tuatoru ko Te Mana Motuhake. Nā Te Turuki! Au, au, auē hā! Hī!
Kawau pū!
(Dr Te Kahautu Maxwell, 2016.)
Tāngia te kōrero katoa
Te whakamahi i tēnei tūemi
Te Matatini Society Incorporated
This item has been provided for private study purposes (such as school projects, family and local history research) and any published reproduction (print or electronic) may infringe copyright law. It is the responsibility of the user of any material to obtain clearance from the copyright holder.
Tāpiritia te tākupu hou